బుడ్గామ్ ఎన్‌కౌంటర్‌లో లష్కరే తోయిబా కీలక ఉగ్రవాది హతం..
శ్రీనగర్,వార్త నేత్రం ప్రతినిధి:
జమ్మూకశ్మీర్‌లో భద్రతా బలగాలకు కీలక విజయం లభించింది. బుడ్గామ్ జిల్లాలోని యూస్‌మార్గ్‌ సమీపంలోని కొరాగ్‌ ప్రాంతంలో మంగళవారం రాత్రి జరిగిన ఎదురుకాల్పుల్లో లష్కరే తోయిబా (LeT)కు చెందిన కీలక ఉగ్రవాది హతమైనట్లు భద్రతా అధికారులు తెలిపారు. భద్రతా వర్గాలు మృతుడిని సులేమాన్ షా అలియాస్ మూసాగా గుర్తించాయి. అయితే భారత సైన్యంలోని చినార్‌ కార్ప్స్‌ తన అధికారిక ప్రకటనలో ఉగ్రవాది పేరును వెల్లడించలేదు.నిర్దిష్ట నిఘా సమాచారంతో ఆపరేషన్‌ కొరాగ్‌ పేరుతో భారత సైన్యం, జమ్మూకశ్మీర్‌ పోలీసులు, సీఆర్‌పీఎఫ్‌ సంయుక్తంగా గాలింపు చర్యలు చేపట్టాయి. కొరాగ్‌ ప్రాంతంలో అనుమానాస్పద కదలికలను గుర్తించిన భద్రతా సిబ్బంది ఉగ్రవాదులను అప్రమత్తం చేయగా, వారు కాల్పులు ప్రారంభించినట్లు సైన్యం తెలిపింది. దీంతో ఇరువర్గాల మధ్య తీవ్ర కాల్పులు చోటుచేసుకున్నాయి.కాల్పుల అనంతరం చేపట్టిన గాలింపు చర్యల్లో బుడ్గామ్‌లోని పాలమైదాన్‌ ప్రాంతంలో మృతదేహాన్ని గుర్తించినట్లు చినార్‌ కార్ప్స్‌ వెల్లడించింది. మృతదేహంతో పాటు యుద్ధ సామగ్రి కూడా స్వాధీనం చేసుకున్నట్లు సైన్యం తెలిపింది. ఆపరేషన్‌ కొనసాగుతున్న సమయంలో మరిన్ని వివరాలు వెల్లడయ్యే అవకాశం ఉందని అధికారులు పేర్కొన్నారు.
పలు దాడుల్లో కీలక పాత్ర?
భద్రతా అధికారుల ప్రకారం సులేమాన్ షా అలియాస్ మూసా పీర్‌ పంజాల్‌ ప్రాంతానికి ఇరువైపులా గత కొన్నేళ్లలో జరిగిన పలు ఉగ్రదాడులతో సంబంధం ఉన్నట్లు ఆరోపణలు ఉన్నాయి. ఈ నెల ప్రారంభంలో యూస్‌మార్గ్‌ కొండ ప్రాంతంలో జరిగిన మరో ఆపరేషన్‌ నుంచి అతడు తప్పించుకున్నట్లు అధికారులు తెలిపారు. సెప్టెంబర్‌ 5న జరిగిన ఆ ఆపరేషన్‌లో అతని సహచరుడిగా పేర్కొన్న యాసిర్‌ హతమైనట్లు వార్తా నివేదికలు పేర్కొన్నాయి.
భద్రతా బలగాల అప్రమత్తత
యూస్‌మార్గ్‌, దూద్‌పథ్రీ పరిసరాల అటవీ ప్రాంతాల్లో ఉగ్రవాదుల కదలికలపై నిఘాను మరింత పెంచినట్లు భద్రతా వర్గాలు తెలిపాయి. తాజా ఎన్‌కౌంటర్‌ అనంతరం పరిసర ప్రాంతాల్లో గాలింపు చర్యలు కొనసాగుతున్నాయి. ఘటనకు సంబంధించిన పూర్తి వివరాలు, స్వాధీనం చేసుకున్న సామగ్రిపై అధికారిక సమాచారం వెలువడాల్సి ఉంది.
Comments
Post a Comment