జర్నలిస్టులకు అక్రిడేషన్ కార్డు గుర్తింపు కాదు…!అక్రిడేషన్ కార్డుతో ముడిపెట్టడం ప్రజాస్వామ్యానికి ముప్పు...! చుంచు కుమార్ అఖిలభారతీయ జర్నలిస్ట్ ప్రొటెక్షన్ ఫోర్స్ చైర్మన్
హైదరాబాద్ ప్రతినిధి | వార్త నేత్రం | జనవరి 26:
జర్నలిస్టు గుర్తింపును అక్రిడేషన్ కార్డుతో ముడిపెట్టే ప్రయత్నాలు పెరుగుతున్న ఈ తరుణంలో, అక్రిడేషన్ కార్డు అసలు ఉద్దేశం ఏమిటి? జర్నలిస్టు అంటే ఎవరు? అనే మౌలిక ప్రశ్నలపై సమాజంలో స్పష్టత అవసరమని మీడియా వర్గాలు అభిప్రాయపడుతున్నాయి. ఈ రెండింటి మధ్య ఉన్న తేడాను గ్రహించకుండా జర్నలిజాన్ని కేవలం కార్డుల పరిధిలో బంధించడం ప్రజాస్వామ్యానికి ప్రమాదకర పరిణామాలకు దారితీస్తుందని హెచ్చరిస్తున్నారు.
అక్రిడేషన్ కార్డు అంటే ఏమిటి?
అక్రిడేషన్ కార్డు అనేది ప్రభుత్వం తన పరిపాలనా అవసరాల కోసం జారీ చేసే ఒక అధికారిక గుర్తింపు పత్రం మాత్రమే.
ప్రభుత్వ కార్యక్రమాలను కవర్ చేయడం,
ప్రభుత్వ కార్యాలయాల్లో ప్రవేశ సౌలభ్యం కల్పించడం,
ప్రభుత్వ పథకాలు, అధికారిక సమాచారం సులభంగా పొందడం
వంటి అవసరాల కోసమే ఈ కార్డు ఉపయోగపడుతుంది.
అర్థం చేసుకోవాల్సిన విషయం ఏమిటంటే—అక్రిడేషన్ కార్డు జర్నలిస్టు హోదాను నిర్ధారించే ధృవీకరణ పత్రం కాదు. అది కేవలం ప్రభుత్వ వ్యవస్థకు అవసరమైన ఒక పరిపాలనా సాధనం మాత్రమే.
జర్నలిస్టు అంటే ఎవరు?
జర్నలిస్టు అనేది ప్రభుత్వం ఇచ్చే కార్డుతో తయారయ్యే వ్యక్తి కాదు.
ప్రజల తరఫున మాట్లాడే వ్యక్తి జర్నలిస్టు.
అన్యాయం, అక్రమాలు, అవినీతిని నిర్భయంగా ప్రశ్నించే వ్యక్తి జర్నలిస్టు.
ప్రజలకు–ప్రభుత్వానికి మధ్య వారధిగా నిలిచే వ్యక్తి జర్నలిస్టు.
నిజాన్ని నిక్కచ్చిగా ప్రజల ముందుకు తీసుకెళ్లే వ్యక్తే నిజమైన జర్నలిస్టు.
జర్నలిజం ఒక కార్డు కాదు.
అది ఒక బాధ్యత.
ఒక వృత్తి.
ఒక సామాజిక కర్తవ్యము.
అక్రిడేషన్ వర్సెస్ జర్నలిస్టు
అక్రిడేషన్ కార్డు జర్నలిస్టును సూచిస్తుందా?
అది జర్నలిస్టు విలువకు ప్రమాణమా?
ఈ ప్రశ్నలకు సమాధానం స్పష్టంగా “కాదు”.
అక్రిడేషన్ అనేది ప్రభుత్వ కార్యక్రమాలకు అనుమతి మాత్రమే. జర్నలిస్టు విలువను నిర్ణయించేది అతని చేతిలో ఉన్న కార్డు కాదు.
అతని ప్రశ్నే అతని గుర్తింపు.
అతని నిజాయితీనే అతని హోదా.
అతని ధైర్యమే అతని అసలైన అక్రిడేషన్.
అక్రిడేషన్ లేకపోయినా జర్నలిస్టు విలువ ఏమాత్రం తగ్గదు.
జర్నలిస్టును గుర్తించేది ఎవరు?
చట్టబద్ధంగా నమోదు అయిన, భారత ప్రభుత్వం గుర్తించిన పత్రికలో పనిచేస్తూ, సంబంధిత ఎడిటర్ జారీ చేసిన గుర్తింపు కార్డుతో వృత్తిని నిర్వర్తిస్తున్న ప్రతి వ్యక్తి జర్నలిస్టే.
జర్నలిస్టును నిజంగా గుర్తించేది
ప్రజల విశ్వాసం,
సమాజంలో అతని పాత్ర,
నిజం చెప్పే అతని ధైర్యం.
కానీ ప్రభుత్వ అక్రిడేషన్ కాదు.
ప్రభుత్వాలకు జర్నలిస్టులపై అసహనం ఎందుకు?
ఎందుకంటే జర్నలిస్టు ప్రశ్నిస్తాడు.
లోపాలను బయటపెడతాడు.
ప్రజల గొంతుగా మారతాడు.
ఈ ప్రశ్నించే స్వరం మౌనమైతేనే అధికారాలకు సౌకర్యం. అందుకే అక్రిడేషన్ను నియంత్రణ సాధనంగా మార్చే ప్రయత్నాలు జరుగుతున్నాయన్న ఆరోపణలు వినిపిస్తున్నాయి. అక్రిడేషన్ ఇవ్వకపోవడం, రద్దు చేయడం, పరిమితం చేయడం ద్వారా జర్నలిస్టులను భయపెట్టాలని, వశపరచుకోవాలని చూస్తున్నారని మీడియా వర్గాలు విమర్శిస్తున్నాయి.
అక్రిడేషన్ కార్డు ప్రభుత్వ సౌలభ్యం కోసం.
జర్నలిస్టు ప్రజాస్వామ్యానికి నాలుగో స్తంభం.
కార్డు లేకపోయినా జర్నలిజం ఉంటుంది.
జర్నలిస్టు గొంతు నొక్కితే ప్రజాస్వామ్యం బలహీనమవుతుంది.
కలమే గొప్పది.
నిజమే శక్తివంతమైనది.
జర్నలిజాన్ని అక్రిడేషన్తో కొలవడం అంటే ప్రజాస్వామ్యాన్ని సంకుచితం చేయడమేనని మీడియా వర్గాలు స్పష్టంగా చెబుతున్నాయి.
Comments
Post a Comment